ఆరోగ్యకరమైన వృద్ధాప్యం కోసం సరైన ఆహార విధానాలు

ఆహారపు అలవాట్లకు ఆరోగ్యకరమైన వృద్ధాప్యానికి మధ్య ఉన్న సంబంధాన్ని ఒక తాజా అధ్యయనం విశ్లేషించింది. అధ్యయనంలో అభిజ్ఞా (cognitive), శారీరక, మానసిక శ్రేయస్సుపై శాస్త్రవేత్తలు దృష్టి పెట్టారు. ముసలివాళ్ల సంఖ్య ప్రపంచవ్యాప్తంగా పెరుగుతోంది కాబట్టి కేవలం వ్యాధులను నివారించడమే కాకుండా ఆరోగ్యకరమైన ముసలితనాన్ని ప్రోత్సహించే ఆహార విధానాలను గుర్తించడం చాలా అవసరమని పరిశోధకులు అభిప్రాయపడ్డారు.

ఈ పరిశోధనలో 1986 నుండి 2016 వరకు జరిగిన రెండు ఆరోగ్య పరిశోధనల నుండి సేకరించిన డేటాను సమగ్రంగా విశ్లేషించారు. ఈ రెండు పరిశోధనలలో అమెరికాకు చెందిన 1,05,000 మందికి పైగా వ్యక్తులను మూడు దశాబ్దాలపాటు ట్రాక్ చేసారు.

ప్రపంచవ్యాప్తంగా ఆరోగ్యమైన జీవితం కోసం జనులు పలు రకాల ఆహార విధానాలను (dietary patterns) పాటిస్తున్నారు. ఆరోగ్యకరమైన ముసలితనాన్ని సాధించడం పై వివిధ ఆహార విధానాల ప్రభావం ఎలాంటిదో నిర్ధారించడం ఈ స్టడీ ప్రధాన లక్ష్యం.

ఆరోగ్యకరమైన వృద్ధాప్యం, అంటే?

ఆరోగ్యకరమైన వృద్ధాప్యం అంటే దీర్ఘకాలిక వ్యాధులు లేకుండా కనీసం 70 సంవత్సరాలు జీవించడంతోపాటు అభిజ్ఞా, శారీరక, మానసిక ఆరోగ్యాన్ని కాపాడుకోవడం అని నిర్వచించారు.

అధ్యయనంలో భాగంగా ఈ 8 ఆహార విధానాలను పరిగణించారు:

1. ప్రత్యామ్నాయ ఆరోగ్యకరమైన ఆహార సూచీ (Alternative Healthy Eating Index; AHEI)
2. ప్రత్యామ్నాయ మధ్యధరా సూచీ (Alternative Mediterranean Index; aMED)
3. రక్తపోటును ఆపడానికి ఆహార విధానాలు (Dietary Approaches to Stop Hypertension; DASH)
4. న్యూరోడెజెనరేషన్ ఆలసించడానికి మధ్యధరా-డాష్ ఇంటర్వెన్షన్ (Mediterranean-DASH Intervention for Neurodegenerative Delay; MIND)
5. ఆరోగ్యకరమైన మొక్కల-ఆధారిత ఆహారం (Healthful Plant-Based Diet; hPDI)
6. ప్లానెటరీ హెల్త్ డైట్ సూచీ (Planetary Health Diet Index; PHDI)
7. ఎంపిరికల్ డైటరీ ఇన్‌ఫ్లమేటరీ ప్యాటర్న్ (Empirical Dietary Inflammatory Pattern; EDIP)
8. హైపర్-ఇన్సులినెమియా కోసం ఎంపిరికల్ ఆహార సూచీ (Empirical Dietary Index for Hyperinsulinemia; EDIH).

ఈ వివిధ ఆహార విధానాలలో కొన్ని పోలికలు లేకపోలేదు. అన్ని ఆహార విధానాలు పండ్లు, కూరగాయలు, తృణధాన్యాల వినియోగించమని, ఎరుపు మరియు ప్రాసెస్ చేయబడ్డ మాంసాహారాన్ని తగ్గించమని చెబుతున్నాయి. అయితే ఒక్కో విధానం ఒక్కో నిర్దిష్టమైన అంశానికి ఎక్కువ ప్రాధాన్యతనిస్తుంది. ఉదాహరణకు aMED విధానం మధ్యధరా ప్రాంతానికి ప్రధానమైన ఆలివ్ నూనె, చేపలు, గింజలపై దృష్టి పెడితే, MIND విధానం గుటిక పళ్ళ (berries) యొక్క అభిజ్ఞా ప్రయోజనాలను ఎక్కువ హైలైట్ చేస్తుంది.

ఆరోగ్యకరమైన వృద్ధాప్యం: ముఖ్యమైన ఫలితాలు మరియు ఆహార విధానాల ర్యాంకింగ్

30 సంవత్సరాల ఫాలో-అప్ తర్వాత 9.3% మంది మాత్రమే ఆరోగ్యకరమైన వృద్ధాప్యాన్ని సాధించారని అధ్యయనం వెల్లడించింది. అయినప్పటికీ, పై ఎనిమిది ఆహార విధానాలలో దేనికి కట్టుబడి ఉన్నా ఆరోగ్య ప్రయోజనాలు ఉన్నాయని, ముఖ్యంగా సరిగ్గా పాటించని వాళ్ళతో పోలిస్తే కట్టుబడి ఉన్నవాళ్ళలో ఆరోగ్యకరమైన ముసలితనం సాధించే అవకాశం ఎక్కువగా ఉందని వెల్లడయ్యింది. అంతేకాకుండా అతిగా ప్రాసెస్ చేయబడ్డ ఆహారాలు తక్కువగా తినటం వలన కూడా ముసలితనంలో ఆరోగ్యంగా ఉండే అవకాశం పెరుగుతుందని తేలింది.

ఆరోగ్యకరమైన వృద్ధాప్యంపై ఆహార విధానాల ప్రభావం ఆధారంగా మనం వాటిని ర్యాంక్ చేస్తే, ఆ వరుస ఇలా ఉంటుంది: AHEI, EDIH, aMED, DASH, PHDI, MIND, చివరగా hPDI. ప్రత్యామ్నాయ ఆరోగ్యకరమైన ఆహార సూచిక (AHEI) బలమైన ప్రభావాన్ని, ఆరోగ్యకరమైన మొక్కల-ఆధారిత ఆహారం (hPDI) బలహీనమైన ప్రభావాన్ని చూపించాయి.

వివిధ ఆహారాలు, పోషకాలను తీసుకోవడం వల్ల కలిగే ప్రయోజనాలను కూడా ఈ అధ్యయనంలో పరిశీలించారు. పండ్లు, కూరగాయలు, తృణధాన్యాలు, అసంతృప్త కొవ్వులు, గింజలు, చిక్కుళ్ళు, తక్కువ-కొవ్వు పాల ఉత్పత్తులను ఎక్కువగా తీసుకోవడం ఆరోగ్యకరమైన వృద్ధాప్యానికి దారితీసింది. దీనికి విరుద్ధంగా ట్రాన్స్ కొవ్వులు, సోడియం, చక్కెర పానీయాలు, ఎర్ర మాంసం లేదా ప్రాసెస్ చేసిన మాంసాహారం ఎక్కువగా తీసుకోవడానికి ఆరోగ్యకరమైన ముసలితనం సాధించడానికి మారు (inverse) సంబంధం కనిపించింది.

ఆసక్తికరంగా కొన్ని ఆహార విధానాల ప్రయోజనాలు నిర్దిష్ట ఉప సమూహాలలో మరింత స్పష్టంగా కనిపించాయి. ఉదాహరణకు, సాధారణంగా పురుషుల కంటే మహిళలు ఆహార విధానానికి ఎక్కువగా కట్టుబడి ఉండటం వల్ల ఎక్కువ ప్రయోజనాలను పొందారు. అలాగే పొగతాగేవారు, 25 కంటే ఎక్కువ BMI (బాడీ మాస్ ఇండెక్స్/శరీర ద్రవ్యరాశి సూచీ) ఉన్న వ్యక్తులు ఎక్కువ ప్రయోజనాలను పొందారు. అంటే చెడు అలవాట్లు, చెడు జీవనశైలి వల్ల పొంచి ఉన్న ప్రమాదాలను మంచి ఆహారం తీసుకోవడంతో తగ్గించుకునే అవకాశం ఉందని ఈ స్టడీ సూచిస్తుంది.

టూకీగా, ఈ పరిశోధన ఆరోగ్యకరమైన వృద్ధాప్యాన్ని పొందడానికి జంతు-ఆధారిత ఆహారాలను మితంగా తీసుకుంటూ, మొక్కల-ఆధారిత ఆహారానికి ప్రాధాన్యత ఇవ్వాలని నొక్కి చెబుతుంది. నడివయసు నుండి ఆరోగ్యకరమైన ఆహార విధానాలను పాటించడం వల్ల ముసలితనంలో అభిజ్ఞా, శారీరక, మానసిక ఆరోగ్యం మెరుగ్గా ఉంటుందని ఈ సమగ్ర విశ్లేషణ సూచిస్తుంది. అలాగే ఈ ఫలితాలను భవిష్యత్తులో ఆహార మార్గదర్శకాలను రూపొందించడానికి ఉపయోగించవచ్చు.